ਪਲਾਸਟਿਕ ਉਤਪਾਦਕਾਂ ਲਈ ਪਲਾਸਟਿਕ ਉਤਪਾਦਨ ਦੀ ਤਾਦਾਦ ਬਾਰੇ ਰਿਪੋਰਟ ਦੇਣਾ ਜ਼ਰੂਰੀ ਬਣਾਏਗਾ ਕੈਨੇਡਾ

ਔਟਵਾ ਵਿੱਚ ਪਲਾਸਟਿਕ ਕਚਰੇ ਨੂੰ ਖ਼ਤਮ ਕਰਨ ਲਈ ਇੱਕ ਗਲੋਬਲ ਸੰਧੀ ਲਈ ਗੱਲਬਾਤ ਸ਼ੁਰੂ ਹੋਣ ਤੋਂ ਇੱਕ ਦਿਨ ਪਹਿਲਾਂ ਵਾਤਾਵਰਣ ਮੰਤਰੀ ਸਟੀਵਨ ਗਿਲਬੌ ਰਾਸ਼ਟਰੀ ਪਲਾਸਟਿਕਸ ਰਜਿਸਟ੍ਰੀ ਦਾ ਐਲਾਨ ਕਰ ਰਹੇ ਹਨ।

ਉਕਤ ਸੰਧੀ ਦਾ ਉਦੇਸ਼ 2040 ਤੱਕ ਪਲਾਸਟਿਕ ਕਚਰੇ ਨੂੰ ਖ਼ਤਮ ਕਰਨ ਲਈ ਇੱਕ ਅੰਤਰਰਾਸ਼ਟਰੀ ਸਮਝੌਤਾ ਸਥਾਪਤ ਕਰਨਾ ਹੈ। ਕੈਨੇਡਾ ਇਸ ਗੱਲਬਾਤ ਦਾ ਇੱਕ ਅਹਿਮ ਹਿੱਸਾ ਹੈ।

ਕੈਨੇਡੀਅਨਜ਼ ਹਰ ਸਾਲ ਚਾਰ ਮਿਲੀਅਨ ਟਨ ਤੋਂ ਵੱਧ ਪਲਾਸਟਿਕ ਸੁੱਟਦੇ ਹਨ, ਅਤੇ ਇਸ ਚੋਂ ਸਿਰਫ਼ ਦਸਵੇਂ ਹਿੱਸੇ ਤੋਂ ਵੀ ਘੱਟ ਪਲਾਸਟਿਕ ਰੀਸਾਈਕਲ ਕੀਤਾ ਜਾਂਦਾ ਹੈ।

ਰਾਸ਼ਟਰੀ ਪਲਾਸਟਿਕਸ ਰਜਿਸਟਰੀ ਪਹਿਲਾਂ ਪਲਾਸਟਿਕ ਪੈਕੇਜਿੰਗ, ਇਲੈਕਟ੍ਰੌਨਿਕਸ ਅਤੇ ਇਕਹਿਰੀ-ਵਰਤੋਂ ਵਾਲੇ ਪਲਾਸਟਿਕ ਉਤਪਾਦ ਬਣਾਉਣ ਵਾਲੀਆਂ ਕੰਪਨੀਆਂਂ 'ਤੇ ਲਾਗੂ ਹੋਵੇਗੀ ਅਤੇ ਬਾਅਦ ਦੇ ਸਾਲਾਂ ਵਿਚ ਇਸ ਵਿਚ ਰੇਜ਼ਿਨ, ਟਾਇਰ ਅਤੇ ਖੇਤੀਬਾੜੀ ਉਤਪਾਦ ਬਣਾਉਣ ਵਾਲੇ ਉਤਪਾਦਕਾਂ ਨੂੰ ਵੀ ਸ਼ਾਮਲ ਕਰਨ ਦੀ ਯੋਜਨਾ ਹੈ।

ਉਹਨਾਂ ਨੂੰ ਹਰ ਸਾਲ ਰਿਪੋਰਟ ਕਰਨੀ ਪਵੇਗੀ ਕਿ ਉਹ ਕਿੰਨਾ ਪਲਾਸਟਿਕ ਬਣਾਉਂਦੇ ਹਨ, ਅਤੇ ਅੰਤ ਵਿਚ ਉਨ੍ਹਾਂ ਉਤਪਾਦਾਂ ਦਾ ਨਬੇੜਾ ਕਿਵੇਂ ਹੁੰਦਾ ਹੈ।

ਦ ਕੈਨੇਡੀਅਨ ਪ੍ਰੈੱਸ
ਪੰਜਾਬੀ ਰੂਪਾਂਤਰ - ਤਾਬਿਸ਼ ਨਕਵੀ, ਸੀਨੀਅਰ ਰਾਈਟਰ, ਰੇਡੀਓ ਕੈਨੇਡਾ ਇੰਟਰਨੈਸ਼ਨਲ